Indian Awards



பிஸினஸ் பக்கங்கள்!

பத்மஸ்ரீ விருது கிடைத்த குதூகலத்தில் உற்சாகமாக இருக்கிறார் ஆடிட்டர் டி.என்.மனோகரன். இந்திய ஐ.டி. துறையின் எடுத்துக்காட்டாக இருந்த ‘சத்யம் கம்ப்யூட்டர்ஸ்’ நிறுவனம் ஓராண்டுக்கு முன்பு சரிந்த போது, அதைத் தூக்கி நிறுத்தியதில் பெரும்பங்கு மனோ கரனைச் சேரும். ”நான்கு மாதம் இரவு, பகல் என்று பார்க்காமல் உழைத்ததன் விளைவு, இந்தியாவின் மானத்தையும் நற்பெயரையும் சேதாரமில்லாமல் காப்பாற்ற முடிந்தது. எந்தப் பிரதிபலனையும் எதிர் பார்க்காமல் செய்த அந்த வேலைக்குக் கிடைத்த ஒரு பெரிய அங்கீகாரம்தான் இந்த விருது” – அடக்கத்தோடு சொல்கிறார் மனோகரன்.

பத்மஸ்ரீ விருது பெறும் முதல் தென்னிந்திய ஆடிட்டர் இவர் என்பது முதல் முக்கியமான விஷயம். குடியாத் தத்தைச் சேர்ந்த இவர், பச்சையப்பன் கல்லூரியில் பி.காம் படித்தபிறகு ஆடிட்டர் ஆனவர்! இந்தியா முழுக்க எட்டு அலுவலகங்கள், அண்மையில் துபாயில் தொடங்கப்பட்ட புதிய அலுவலகம் என எப்போதும் பிஸியாக இருக்கும் அவரை, சென்னை அபிராமபுரத்தில் உள்ள அவரது அலுவலகத்தில் சந்தித்தோம். பல்வேறு விஷயங்களைப் பற்றி அவர் பேசினாலும் ‘சத்ய’த்தைச் சுற்றியே பேச்சு திரும்பத் திரும்ப வட்டமடித்துக் கொண்டிருந்தது.

”வெளிநாடுகளில் ஒரு பெரிய நிறுவனம் திடீரென திவாலானால், ஒன்று அதை அரசாங்கம் ஏற்றுக் கொள்ளும். இல்லாவிட்டால், ஒழியட்டும் என்று அப்படியே விட்டுவிடும். ஆனால் நம் இந்திய அரசாங்கம்

இந்த இரண்டையும் செய்யாமல் ஆறு பேர் கொண்ட குழுவை (அதில் நானும் ஒருவன்!) நியமித்து, அந்த நிறுவனத்தை மீண்டும் சரிபடுத்தித் தரச் சொன்னது. எங்கள் ஆறு பேருக்கும் ஏற்கெனவே நிறைய வேலைகள் இருந்தாலும், ஒரு தேச சேவையாக நினைத்தே அந்த வேலையைச் செய்தோம். இந்த வேலைக்காக ஒரு ரூபாய்கூட நாங்கள் சம்பளம் வாங்கவில்லை. ஓய்வின்றி உழைத்ததில் 10 பாடங்களையும் கற்றுக்கொள்ள முடிந்தது. இதன்படி நடந்தால் நாம் எந்தச் சிக்கலிலும் மாட்ட மாட்டோம்” என்றார் அவர். அந்த 10 பாடங்கள் இதோ…

இன்டிபென்டன்ட் டைரக்டர்களுக்கு தைரியம் தேவை!

ஒரு நிறுவனம் சரியாகச் செயல்படுகிறதா என்பதை பலரும் கவனமாகக் கண்காணிக்க வேண்டும் என்றாலும், போர்டு உறுப்பினர்களுக்கே இதில் முக்கியப் பொறுப்பு இருக்கிறது. பெரும்பாலான நிறுவனங்களில் அதன் சொந்தக்காரர்களே போர்டின் தலைவராகவும் மற்ற முக்கியப் பதவிகளிலும் இருக்கின்றனர். அவர்கள் தவறு செய்தால் அதை மற்ற போர்டு உறுப்பினர்கள் கண்டுகொள்ளாமல் விட்டுவிடுகின்றனர். ஆனால் அந்த நிறுவனத்தோடு எந்த வகையிலும் சம்பந்தப்படாத ‘இன்டிபென்டன்ட் டைரக்டர்கள்’ அதைக் கட்டாயம் தட்டிக் கேட்கவேண்டும்.

அதற்குத் தேவையான தைரியமும் விஷயஞானமும் விழிப்புணர்வும் அவர்களுக்கு வேண்டும். ‘சத்யம்’ வீழ்ச்சிக்குப் பிறகு இன்டிபென்டன்ட் டைரக்டர்களின் பொறுப்பு கணிசமாகவே உயர்ந்திருக்கிறது. இனிவரும் காலத்திலாவது எந்த கணக்கைக் காட்டினாலும் அது எந்த அளவுக்கு சரி, தவறு என்பதை ‘இன்டிபென்டன்ட் டைரக்டர்கள்’ கேள்வி கேட்கவேண்டும். அப்படிப்பட்டவர்கள் போர்டில் அவசியம் இருக்கிற மாதிரி அந்த போர்டை அமைக்கவேண்டும்.

‘ஆடிட் கமிட்டி’க்கு சுதந்திரம் வேண்டும்!

ஒரு நிறுவனம் சரியாகச் செயல்படுகிறதா என்பதை சரிபார்க்கும் வேலை ‘ஆடிட் கமிட்டி’யைச் சேர்ந்தது. என்ன செலவு செய்கிறோம், அதை எதற்காகச் செய்கிறோம்? இந்த செலவு முறையானதுதானா? அங்கீகரிக்கப்பட்டதா? இப்படி பல கேள்விகளைக் கேட்கக்கூடிய சுதந்திரம் ‘இன்டர்னல் ஆடிட் கமிட்டி’க்கு அளிக்கவேண்டும். அவர்கள் வேலையை சுதந்திரமாகச் செய்யவிட்டாலே போதும், சிறு தவறைக்கூட ஆரம்பத்திலேயே கண்டுபிடித்துச் சொல்லிவிடுவார்கள். ஆனால், ‘தவறுகளைக் கண்டுகொள்ளாதீர்கள்’ என்று நீங்கள் கட்டளை யிட்டால், அப்படி ஒரு கமிட்டி இருந்தும் எந்தப் பயனும் இல்லாமல் போய்விடும்.

‘ஆடிட்டிங்’ நிறுவனங்களே பொறுப்பு!

ஒரு நிறுவனத்தில் மிகப்பெரிய மோசடி நடந்திருக்கிறது எனில், அதற்கான பொறுப்பை அந்த நிறுவனத்தின் கணக்கு -வழக்குகளைச் சரிபார்த்த ஆடிட்டிங் நிறுவனமே ஏற்றுக் கொள்ளவேண்டும். ஆடிட்டிங் என்று வரும்போது என்னென்ன விஷயங்களைச் சரிபார்க்கவேண்டும் என்று ஒரு செக்லிஸ்ட் வைத்துக் கொண்டு சரிபார்த்தால் மட்டும் போதாது. ஒவ்வொரு வரவையும் செலவையும் முறையாக, நேர்மை யாகச் செய்திருக்கிறார்களா என்று ஆராய்ந்து பார்த்துவிட்டுத்தான் கையெழுத்திட வேண்டும். காரணம், எல்லா முதலீட்டாளர்களாலும் ஒரு நிறுவனத்தின் கணக்கு -வழக்குகளை நேரடியாகப் பார்க்கமுடியாது. அவர்கள் ‘ஆடிட்டிங்’ நிறுவனத்தின் கையெழுத்தை நம்பியே அதில் முதலீடு செய்கின்றனர். முதலீட்டாளர்களின் அந்த நம்பிக்கைக்கு ஆடிட்டிங் நிறுவனங்கள் ஒருபோதும் துரோகம் செய்யக்கூடாது.

‘இன்டர்னல் ஆடிட்’டை வெளியே கொடுக்கலாம்!

‘இன்டர்னல் ஆடிட் கமிட்டி’யில் இருக்கும் ஊழியர்கள் அந்த நிறுவனத்தைச் சேர்ந்தவர்கள் என்பதால் அவர்களால் கணக்கு-வழக்குகளை நேர்மையாக, சரியாகப் பார்க்க முடிவதில்லை. அதிகாரத்தில் இருப்பவர்கள் என்ன சொல்கிறார்களோ, அதன்படி கணக்கை முடித்துக் கொடுத்துவிடுகின்றனர். இந்தப் பிரச்னையைத் தவிர்க்க, ‘இன்டர்னல் ஆடிட்’ வேலையை வெளியில் இருக்கும் வேறு ஒரு ஆடிட் நிறுவனத்திடம் கொடுத்து செய்யச் சொல்லலாம். இதனால் ரகசியம் கசிந்துவிடும் என்று பயப்படத் தேவையில்லை. முக்கியமான தகவல்களை மட்டும் வைத்துக் கொண்டு, மீதமுள்ள வேலையை தாராளமாக வெளியே கொடுக்கலாமே!

தவறை சுட்டிக் காட்டினால் பாதுகாப்பு!

‘விசில் ப்ளோயர் பாலிசி’ என்று ஒரு கொள்கை உண்டு. ஒரு நிறுவனத்தில் யார் தவறு செய்தாலும் அதை விசாரிப்பதுதான் இந்த பாலிசி. ஒரு நிறுவனத்தில் தவறு நடக்கிறது என்பதை யாரிடம் சொல்வது என்பதுதான் இப்போதிருக்கும் மிகப் பெரிய பிரச்னை. காரணம், யாரோ தவறு செய்தால் நிறுவனத்தின் தலைவரிடம் புகார் செய்யலாம். ஆனால் அந்த நிறுவனத்தின் தலைவரே தவறு செய்தால், அதை யார் விசாரிப்பது? என்கிற மாதிரியான கேள்விக்கு புதிய விதிமுறைகளை உருவாக்கலாம். இந்த விசில் ப்ளோயர் பாலிசியை இன்னும் பலப்படுத்துவதன் மூலம் நிறுவனங்களை சரியான பாதையில் கொண்டு செல்லலாம்.

திறமையான ஊழியர்களே சொத்து!

ஒரு நிறுவனத்தின் கஸ்டமர்கள் மாறலாம். முதலாளி கள்கூட மாறலாம். ஆனால் திறமையான ஊழியர்கள் இருந்தால் அந்த நிறுவனம் எந்த காலத்திலும் விழாது. சத்யம் நிறுவனத்தின் திறமையான ஊழியர்கள் பலர் வேறு எங்கும் ஓடிவிடாமல் தொடர்ந்து இதே நிறுவனத்தில் இருந்ததால் அந்த நிறுவனத்தை இவ்வளவு குறைவான காலத்துக்குள் சேதாரமில்லாமல் மீட்டுக் கொண்டுவர முடிந்தது.

எதிர்பாராததை எதிர்பாருங்கள்!

வாழ்க்கையில் எப்போதும் பாசிட்டிவாக இருப்பது நல்லதுதான். ஆனால் கொஞ்சம் நெகட்டிவாக யோசிப்பதும் அவசியம். அப்படி யோசிப்பதன் மூலம் எதிர்காலத்தில் நடக்கப் போகும் மிகப் பெரிய அசம்பாவிதத்திலிருந்து உங்களை தப்பிக்க வைத்துக் கொள்வதற்கான வழிமுறைகளை ஏற்படுத்திக் கொள்வீர்கள்.

நோக்கம் மட்டுமல்ல,
வழியும் நேர்மையாக இருக்கவேண்டும்!

உழைப்பால், உயர்ந்த சிந்தனையால், தொலை நோக்கால் மிக உயர்ந்த இடத்தை அடையமுடியும். ஆனால் வெற்றி அடைய வேண்டும் என்கிற வெறியின் காரணமாக தவறான பாதையைத் தேர்வு செய்தால் மிகப் பெரிய வீழ்ச்சியைச் சந்தித்தே ஆகவேண்டும். எனவே நீதி, நேர்மை போன்ற விஷயங்களை எந்தக் காலத்திலும் ஒதுக்கி வைத்துவிடாதீர்கள்.

பேராசை, வேண்டவே வேண்டாம்!

ஆசை நாசம் செய்யும். பேராசை சர்வநாசம் செய்யும். உங்களுக்கு வேண்டியதெல்லாம் கிடைக்கும் என்கிறபோது கிடைப்பதெல்லாம் உங்களுக்கானதாக ஏன் ஆக்கிக்கொள்ள நினைக்கிறீர்கள்? இந்த பேராசை, சொந்தபந்தத்தில் ஆரம்பித்து சொத்து சேர்ப்பது வரை எப்படி வேண்டுமானாலும் உருவாகலாம். அதை உருவான நிமிஷத்திலேயே கிள்ளி எறிந்தால் மட்டுமே நம்மால் நிலைத்து நிற்கமுடியும்.

முயன்றால் முடியாதது இல்லை!

‘சத்யம்’ நிறுவனத்தை சிக்கலிலிருந்து காப்பாற்றும் வேலையில் இறங்கியபோது, ‘உங்களுக்கு எதுக்கு சார் இந்த வேண்டாத வேலை’ என்றனர் சிலர். ஆனால், 50 ஆயிரம் குடும்பங்கள், பல கோடி முதலீட்டாளர்கள், எல்லாவற்றுக்கும் மேலாக நம் இந்திய நாட்டின் மானத்தையும் நற்பெயரையும் காப்பாற்ற வேண்டும் என்பதற்காகவே இந்த வேலையை ஏற்றுக் கொண்டோம். சுயநலமற்ற எங்கள் லட்சியத்தையும், அவ்வளவு சீக்கிரம் நாங்கள் விழுந்துவிட மாட்டோம் என்கிற முயற்சியையும் கண்ட வெளிநாட்டு கஸ்டமர்கள், எங்களுக்கு முழுஆதரவு தந்தனர். அதனோடு சத்யம் ஊழியர்களின் ஆதரவும் சேர, அந்த வேலையை நூறு சதவிகிதம் சரியாக முடிக்க முடிந்தது.”


ஐந்து விருதுகளில் மூன்று “தமிழர்களுக்கு” (ரெட்டிகாரு ஆட்சேபிக்கலாம். ராமகிருஷ்ணன் அமெரிக்க குடிமகன்.) பத்மவிபூஷன் கிடைத்திருக்கிறது.

மிருதங்க வித்வான் உமையாள்புரம் சிவராமனுக்கு பத்ம விபூஷன் விருது கிடைத்திருக்கிறது. அதிசயம்தான்! மிருதங்க வித்வான்களை எல்லாம் யாரும் பொதுவாக கண்டுகொள்வதில்லை. அப்படியே உ. சிவராமனை யாராவது சிபாரிசு செய்திருந்தாலும் பத்மஸ்ரீக்கு மேலே எதிர்பார்ப்பது ஆச்சரியம். இவரை விட பல மடங்கு தாக்கம் வாய்ந்த இளையராஜா, ரஹ்மானுக்கே இப்போதுதான் பத்மபூஷன். (கவனியுங்கள், இங்கே தாக்கத்தைப் பற்றி பேசுகிறேன், திறமையைப் பற்றி இல்லை) இது நல்ல விஷயம். இப்படிப்பட்ட கலைகளை recognize செய்த இந்திய அரசுக்கு, சிபாரிசு செய்த தமிழக அரசுக்கு ஒரு சபாஷ்!
சிவராமன் ஒரு ப்ளாக் எழுதுகிறார், போய்ப் பாருங்கள்!
அவருடைய வார்த்தைகளில் (ஹிந்துவுக்கு நன்றி!)

This is the first time the mridhangam has been selected for the most prestigious award and I am really fortunate to be the first recipient. For all my service to the art of mridhangam, spanning over 60 years, I consider this award a signal honour to me and my musical career. It will also be a trendsetter for the present and future generations of percussionists who can strive and achieve such honours by their total dedication and sincerity.

நோபல் பரிசு பெற்ற வெங்கட்ராமன் ராமகிருஷ்ணனுக்கு பத்ம விபூஷன் கொடுக்கப்பட்டிருக்கிறது. அடுத்த வருஷம் மறந்துவிடும், இப்போதே கொடுத்ததற்கு ஒரு சபாஷ்!

அப்போலோ ஹாஸ்பிடல் நிறுவனர் டாக்டர் பிரதாப் சந்திர ரெட்டிக்கு பத்ம விபூஷன். ஒரு “புதிய” தொழிலை ஆரம்பித்தவர் என்றுதான் இவரை சொல்ல வேண்டும். இதுவும் தகுதி உள்ளவருக்கே கொடுக்கப்பட்டிருக்கிறது. அவருடைய வார்த்தைகளில் (ஹிந்துவுக்கு நன்றி!)

I am so pleased that this award is a recognition for all the clinicians who have managed to put Indian healthcare on the world map. It makes me all the more committed to bringing excellence in healthcare. We are also now focussing on making quality healthcare available to all with our slogan ‘Touch a billion lives.’

43 பத்மபூஷன் விருதுகளில் இரண்டு மூன்று (நான்கு?) தமிழர்கள்தான் – ராஜாவும் ரஹ்மானும். ஏற்கனவே எழுதிவிட்டேன்.
ராஜாவின் வார்த்தைகளில் (ஹிந்துவுக்கு நன்றி!)

When I came out of the recording studio, the entire street was clogged with people. I am pleased. What is there to say? Silence is my message.

ஆரோக்யசாமி பால்ராஜ் – ஸ்டான்ஃபோர்ட் பேராசிரியர். வயர்லெஸ் தொழில் நுட்ப நிபுணர்.

நாராயணன் வகுள் – பேரை வைத்துப் பார்த்தால் தமிழர் மாதிரி தெரியவில்லை. சென்னை ராமகிருஷ்ணா பள்ளியிலும் லயோலாவிலும் படித்தவராம். ஸ்டேட் பாங்க், சென்ட்ரல் பாங்கில் பெரிய பதவிகளில் இருந்திருக்கிறார்.

81 பத்மஸ்ரீ விருதுகளில் 8 தமிழர்கள்தான்:
பிரபல ஹிந்தி நடிகை ரேகாவுக்கு (ஜெமினி கணேசன், புஷ்பவல்லியின் மகள்) கிடைத்திருக்கிறது. தகுதி உள்ளவர்தான்.
ராஜீவ் காந்தி வழக்கில் துப்பு துலக்கிய முன்னாள் சி.பி.ஐ. டைரக்டர் டி.ஆர். கார்த்திகேயனுக்கு கிடைத்திருக்கிறது. இவரும் தகுதி உள்ளவர்தான்.
பத்மா சேஷாத்ரி பள்ளி நிறுவனர் ராஜலக்ஷ்மி பார்த்தசாரதிக்கு (ஒய்.ஜி.பி.யின் மனைவி, ஒய்.ஜி. மகேந்திராவின் அம்மா) கிடைத்திருக்கிறது. தகுதி உள்ளவர்தான். அவருடைய வார்த்தைகளில் (ஹிந்துவுக்கு நன்றி!)

I am very happy that education has been recognised with this award. It is the liberating kind of education that Padma Seshadri Bala Bhavan group of schools has been inculcating, with the right mix of art, education and culture, that has been recognised. I have to specially thank my parents and husband who had stood by me, and I share this with the staff of the schools and the students.

பிரபல எழுத்தாளர் இந்திரா பார்த்தசாரதிக்கு கிடைத்திருகிறது. இதைப் பற்றி தனிப் பதிவு இங்கே.
டாக்டர் ஜலகண்டபுரம் ஆர். கிருஷ்ணமூர்த்தி விருது பெறுகிறார். குன்றத்தூரில் இருக்கிறாராம். சித்த மருத்துவராம்.
ஃ பார்முலா ஒன் கார் ரேஸ் வீரர் கார்த்திகேயனுக்கு விருது கிடைத்திருக்கிறது. இவரும் தகுதி உள்ளவர்தான்.
டி.வி.எஸ். தலைவர் வேணு ஸ்ரீனிவாசனுக்கு விருது கிடைத்திருக்கிறது. தகுதி உள்ளவர்தான்.
டி.என். மனோகரன் என்ற தொழிலதிபருக்கும் கிடைத்திருக்கிறது. என்ன தொழில் செய்கிறார் என்றுதான் தெரியவில்லை. 🙂 இவர் அக்கௌண்டன்ட்டாம். இப்போது இந்திய அரசு இவரைத்தான் சத்யம் கம்ப்யூட்டர்சின் தலைவராக நியமித்திருக்கிறதாம்.

தொகுக்கப்பட்ட பக்கம்: ஆளுமைகள்

தொடர்புடைய பதிவுகள்:
உமையாள்புரம் சிவராமனின் ப்ளாக்
வெங்கடராமன் ராமகிருஷ்ணன் பற்றி விக்கி குறிப்பு
பிரதாப் ரெட்டி பற்றி அப்போலோ ஆஸ்பத்திரி தளத்தில்

இளையராஜாவுக்கும் ரஹ்மானுக்கும் பத்மபூஷன் விருது பற்றி நான்
ஆரோக்யசாமி பால்ராஜின் பக்கம்
நாராயணன் வகுளைப் பற்றி விக்கி குறிப்பு, ஃபோர்ப்ஸ் குறிப்பு

ரேகா பற்றிய விக்கி குறிப்பு
டி.ஆர். கார்த்திகேயன் ராஜீவ் கொலை வழக்கு பற்றி அளித்த ஒரு பேட்டி, ராஜீவ் கொலை பற்றி துப்பு துலக்கிய குழு – ஒரு அறிமுகம்
திருமதி ஒய்.ஜி.பி. பற்றி பத்மா சேஷாத்ரி பள்ளி தளத்தில்
இந்திரா பார்த்தசாரதிக்கு பத்மஸ்ரீ பற்றி நான்
ஜலகண்டபுரம் கிருஷ்ணமூர்த்தி பற்றி விக்கி குறிப்பு
கார் ரேஸ் வீரர் கார்த்திகேயன் பற்றிய விக்கி குறிப்பு, கார்த்திகேயனின் தளம்
வேணு ஸ்ரீனிவாசனைப் பற்றி பிசினஸ்வீக்
டி.என். மனோஹரனைப் பற்றி

விருது பெற்றவர்களின் லிஸ்ட்


சரோஜினி வரதப்பனுக்கு இந்த வருஷம் பத்ம பூஷன் விருது கொடுக்கப்பட்டது. அதை பற்றி எழுதிய பதிவில் இவரைப் பற்றி சரியாக தெரியவில்லை என்று சொல்லி இருந்தேன். இவரை பற்றி விகடனில் அந்தக் காலத்தில் வந்திருந்த கட்டுரை. ஒரே குறை, அதை படித்த பிறகும் அவர் என்ன சேவை செய்தார் என்று தெரியவில்லை. அவர் முன்னாள் முதல்வர் பக்தவத்சலத்தின் மகள் என்று மட்டும் தெரிகிறது.

விகடனுக்கு நன்றி, ஓவர் டு விகடன்.

விகடன் பொக்கிஷம்

”சமூக சேவையில்தான் எனக்குத் திருப்தி!”

சில பேர், அரும் பெரும் காரியங்களை அமைதியோடு செய்து முடித்து விட்டு, அடக்க ஒடுக்கமாக இருந்து விடுவார்கள். சிலரோ சாதாரணமான காரியங்களைக்க ூட ‘ஹா, ஹூ’ என்று ஊரைக் கூட்டி, அமர்க்களப்படுத்திக் கொண்டுதான் செய்வார்கள்.

திருமதி சரோஜினி வரதப்பன் முதல் வகையைச் சேர்ந்தவர்.

”அரசியலில் தங்களுக்கு ஆர்வம் இல்லையா?” என்று கேட்டபோது, ”உண்டு. அதைக் காட்டிலும் சமூக சேவை செய்வதையே நான் பெரிதும் விரும்புகிறேன். இந்த ஆவலை எனக்குத் தூண்டிவிட்டவர் திருமதி அம்புஜம்மாள்தான்” என்கிறார் இவர்.

நேருஜி பிரதம மந்திரியான புதிதில் ஒருமுறை சென்னைக்கு விஜயம் செய்தார். அப்போது மாதர்கள் சங்கத்தின் சார்பில் அவருக்கு இந்தியில் ஒரு வரவேற்பு வாசித்து அளிக்கப் பட்டது. அந்த வரவேற்பை இந்தியில் எழுதியது, வாசித்தது இரண்டுமே சரோஜினி வரதப்பன்தான்.

மற்றொரு சமயம் இவர் டெல்லிக் ுப் போயிருந்தபோது, திருமதி அம்புஜம்மாள் இவரை நேருவுக்கு அறிமுகம் செய்து வைத்தார். ”எனக்கு இவரைத் தெரியுமே!” என்றார் நேருஜி. ”இவர் அசெம்பிளி மெம்பராக வேண்டும் என்பது என் ஆசை” என்றார் அம்புஜம்மாள். நேருஜி உடனே சரோஜினி வரதப்பனைப் பார்த்து, ”தங்களுக்கு அந்த ஆசை இருக்கிறதா?” என்று கேட்டார்.

”இல்லை. எனக்கு இப்போது செய்து கொண்டிருக்கும் சமூக சேவையில்தான் திருப்தி” என்றார் இவர்.

சரோஜினி வரதப்பன் இப்போது வகித்து வரும் முக்கியப் பதவிகள்… சென்சார் போர்டு அங்கத்தினர், கௌரவ மாஜிஸ்டிரேட், மாதர் நல இலாகா சேர்மன்.

ஆங்கிலத்தில் சரளமாகப் பேசும் இவர், ”அந்தக் காலத்தில் பேட்டை முதலியார்கள் ரொம்ப வைதீகம். ‘பெண்களுக்கு அதிகப் படிப்பு எதற்கு?’ என்று கூறிவிட்டார்கள். ஆனாலும், நான் இந்தியில் விஷாரத் பாஸ் செய்திருக்கிறேன்” என்கிறார்.

சமீபத்தில் இந்திராகாந்தி சென்னை ராஜ்யத்தில் சுற்றுப்பயணம் செய்த போது, அவர் புரிந்த ஆங்கிலச் சொற்பொழிவுகளை தமிழில் மொழி பெயர்த்தவர் இவர்தான்.

மாதர் நல இலாகாவில் இவர் புரிந்துள்ள சாதனைகள் பல. சென்னை ராஜ்யத்திலுள்ள 373 பிளாக்குகளுக்கும் சுமார் 10,000 மாதர் நலச் சங்கங்களுக்கு மேல் தோன்றி இருக்கின்றன என்றால், அதற்கு இவருடைய ஆர்வமும் உழைப்புமே முக்கிய காரணம்.

”இந்தியாவில் முதன்முதலில் சென்னையில்தான் மாதர் நல இலாகா தொடங்கப்பட்டது. அதைப் பார்த்து இப்போது உத்தரப்பிரதேசத்திலும் ஆந்திராவிலும் ஆரம்பித்திருக்கிறார்கள்” என்கிறார் இவர்.

”எத்தனை முறை வெளிநாட்டில் சுற்றுப்பயணம் செய்திருக்கிறீர்கள்?” என்று கேட்டதற்கு, ”முதல்முறை 1956ல் ஜெனீவாவில் நடைபெற்ற ஐ.எல்.ஓ. மகாநாட்டுக்கு என் தந்தை (முதல்வர் பக்தவத்சலம்) போனபோது நானும் உடன் சென்றேன். லண்டன், பிரான்ஸ், ஸ்வீடன், வெஸ்ட் ஜெர் மனி, கெய்ரோ ஆகிய இடங்களைப் பார்த்துவிட்டு வந்தேன். அவற்றில் மேற்கு ஜெர்மனிதான் எனக்கு மிகவும் பிடித்திருந்தது. யுத்தத்தால் பெரிதும் பாதிக்கப்பட்ட அந்த நாடு, யுத்தத்திற்குப் பின் நல்ல முன்னேற்றம் கண்டிருக்கிறது. அங்கே பெண்கள் லிப்ஸ்டிக் போடுவதில்லை. தேச முன்னேற்றத்தையே முக்கிய லட்சியமாகக் கொண்டு உழைத்து வருகிறார்கள்” என்றார். சமீபத்தில் அமெரிக்க நாட்டின் அழைப்பை ஏற்று, அங்கும் சுற்றுப்பயணம் செய்துவிட்டு வந்துள்ளார் இவர்.

”குபேர நாடாக விளங்கும் அமெரிக்காவிலும் போக்குவரத்து வசதியும், மின்சாரத் தொடர்பும் இல்லாத பிற்போக்குப் பகுதிகள் நிறைய இருக்கின்றன. அந்தப் பகுதிகளின் முன்னேற்றத்திற்காக ஜனாதிபதி ஜான்சன் அங்கே பணத்தைக் கொண்டு போய்க் கொட்டிக்கொண்டிருக்கிறார். அமெ ரிக்காவிலும் வயது வராத சிறுவர்கள் நிறையக் குற்றம் புரிகிறார்கள். வறுமையினால்தான் இப்படிச் செய்கிறார்கள் என்று கூறமுடியாது. தாயின் கவனிப்பு இல்லாததே காரணம். ஹாலிவுட்டில் விசேஷமாக எதுவுமில்லை. நம் கோடம்பாக்கத்தைப் போல்தான் இருக்கிறது.”

இவையெல்லாம் சரோஜினி வரதப்பன் தரும் தகவல்கள்.

கர்னாடக இசையில் இவருக்கு நல்ல தேர்ச்சி உண்டு. ஐந்நூறு கீர்த்தனைகளுக்கு மேல் பாடத் தெரிந்த இவருக்கு, பிடில் வாசிப்பிலும் நல்ல புலமை உண்டென்பது பலருக்குத் தெரியாத செய்தியாகும்.


இந்தியாவில் ஜனத்தொகை நூறு கோடியை தாண்டிவிட்டது. இந்த விருதுகளின் எண்ணிக்கையை வைத்துப் பார்த்தால் கோடிப் பேருக்கு ஒரு விருது கொடுக்கப்படுகிறது போல. சாதனையாளர்களை கவுரவப்படுத்துவது நல்ல விஷயம். சில தவறுகள் இருந்தாலும். ஊடகங்கள் இவர்களைப் பற்றி எழுத வேண்டும். இப்போதைய நிலையைப் பார்த்தால் எல்லாரும் வாழ்த்து சொல்லிவிட்டு போய்க்கொண்டே இருக்கிறார்கள். கொடுக்கப்பட்டது சரி, தவறு என்று விமரிசனங்களை வைக்க வேண்டும், அப்படி செய்தால்தான் எதிர்காலத்தில் இந்த விருதுகள் கொடுக்கப்படுவது நன்றாக செயல்படும்.

விருது பெற்றவர்கள் லிஸ்டை பார்த்தேன். எனக்கு தெரிந்தவர்கள் வெகு சிலரே.

சுந்தர்லால் பஹுகுணா, பத்ம விபூஷன்: சிப்கோ இயக்கத்தை உருவாக்கியவர்களில் ஒருவர். சரியானவருக்கு கொடுக்கப்பட்டிருக்கிறது.

பத்ம விபூஷன் விருது கொடுக்கப்பட்ட வேறு எவரையும் எனக்கு தெரியாது.

தெலுங்கு நடிகர் கிருஷ்ணா, பத்ம பூஷன்: இது கொஞ்சம் டூ மச்சண்டி. கிருஷ்ணாவின் சாதனை என்னங்க? அவருக்கு எதுக்கு ஒரு அவார்ட்? ஒரு வேளை முன்னூறு படங்களுக்கு மேல் நடித்ததற்கு அவார்டா?

ஹிந்தி திரைப்பட பின்னணி பாடகி, ஷம்ஷாத் பேகம்: ஐம்பதுகளில் பிரபலமான திரைப்பட பின்னணிப் பாடகி. எனக்கு மிகவும் பிடித்த குரல்களில் ஒன்று. ஒரு மாதிரி கனமான குரல். ஓரளவு பரவை முனியம்மாவை நினைவு படுத்தும் குரல். ஆண்களில் திருச்சி லோகநாதனை நினைவுபடுத்தும் குரல். கபி ஆர் கபி பார், லேக்கே லேக்கே பெஹ்லா பெஹ்லா ப்யார், பச்பன் கே தின் புலா ந தேனா போன்ற பல புகழ் பெற்ற பாடல்களை பாடியவர். ஹிந்திப் பட உலகில் அவரது சாதனை தமிழ் பட உலகில் திருச்சி லோகநாதனுக்கு ஏறக்குறைய சமமானது. ஹிந்தி பாடல்களின் தாகம் அதிகம், அதனால் அவருக்கு விருது கொடுக்கப்பட வேண்டியதுதான்.

ஆனால் எம்எஸ்வி, இளையராஜா போன்றவர்களுக்கு ஒரு பத்மஸ்ரீ விருது கூட கொடுக்கப்பட்டதா என்று தெரியவில்லை. அது ஒரு பெரிய அநியாயம்.

தனஞ்சயன், சாந்தி தனஞ்சயன் தம்பதியினர், பத்ம பூஷன்: இவர்களை இங்கே சில நண்பர்களின் அரங்கேற்றத்தில் பார்த்திருக்கிறேன். நடனம் பற்றி எனக்கு தெரியாது. விருது பற்றி கருத்து சொல்ல முடியாது.

கணபதி ஸ்தபதி, பத்ம பூஷன்: இவர்தான் கன்னியாகுமரியில் திருவள்ளுவர் சிலையை கட்டியவரோ? விருது பற்றி கருத்து சொல்ல முடியாது.

சி. கே. பிரகலாத்: இவர் ஒரு மானேஜ்மென்ட் குரு. வறுமை ஒழிப்பை பற்றி பாட்டம் ஆஃப் த பிரமிட் என்ற ஒரு புகழ் பெற்ற புத்தகத்தை எழுதி இருக்கிறார். நான் படித்ததில்லை. அமெர்க்காவில் வாழ்கிறார். விருது பற்றி கருத்து சொல்ல முடியாது.

ஜெயகாந்தன்: சரியானவருக்கு கொடுக்கப்பட்டிருக்கிறது. இவரை பற்றி தனியே ஒரு போஸ்ட் எழுதி இருக்கிறேன்.

ராமச்சந்திர குஹா: எனக்கு பிடித்த எழுத்தாளர்களில் ஒருவர். அவர் கிரிக்கெட் பற்றி எழுதுவது எனக்கு ரொம்பப் பிடிக்கும். அருமையான புத்தகங்கள் எழுதி இருக்கிறார். ஆனால் நான் இவருக்கு பத்மஸ்ரீ விருதுதான் சிபாரிசு செய்திருப்பேன்.

சாம் பிட்ரோடா: இந்தியாவில் டெலிகம்யூனிகேஷன் புரட்சியின் சிற்பிகளில் ஒருவர். சரியானவருக்கு கொடுக்கப்பட்டிருக்கிறது.

ப்ரொஃபசர் கைலாத்: இருபது வருஷங்களுக்கு முன் நான் கண்ட்ரோல் சிஸ்டம்சில் எம்.டெக். படிப்பதாக பொய் சொல்லிக்கொண்டிருந்த போது இவரது புத்தகங்களையும் பேப்பர்களையும் புரட்டி இருக்கிறேன். அப்போதே புரியவில்லை. ஆனால் விருது கொடுக்கப்பட வேண்டியதுதான். இவர் அப்போதே ஒரு என்ஆர்ஐ.

சரோஜினி வரதப்பன்: சமூக சேவகி. முன்னாள் முதலமைச்சர் பகதவத்சலத்தின் மகள் என்று நினைக்கிறேன். முன்னாள் மத்திய அமைச்சர் ஜெயந்தி நடராஜனின் அம்மாவோ? எனக்கு இவர் என்ன சேவை செய்தார் என்று தெரியாது, அதனால் விருது பற்றி ஒன்றும் சொல்ல முடியாது.

அபினவ் பிந்த்ரா: துப்பாக்கி சுடுதலில் ஒலிம்பிக்கில் தங்கப் பதக்கம் பெற்றவர். விருது கொடுக்கப்பட வேண்டியதுதான்.

மொத்தம் முப்பது பேருக்கு பத்ம பூஷன் விருது கொடுக்கப்பட்டிருக்கிறது. சேஷாத்ரி என்பவர் தமிழ்நாட்டுக்காரர். மாத்சயின்ஸ் இன்ஸ்டிட்யூட்டின் தலைவராம்.

திலகன், பத்மஸ்ரீ: திலகனை எனக்கு தமிழ் படங்கள் மூலமாகத்தான் தெரியும். அதை வைத்து அவருக்கு ஒரு விருதும் கொடுத்திருக்க முடியாது. அவர் மலையாளப் படங்களில் என்ன சாதித்திருக்கிறார் என்று எனக்கு தெரியாது.

விவேக், பத்மஸ்ரீ: இவரைப் பற்றி தனியாக ஒரு போஸ்ட் எழுதி இருக்கிறேன்.

ஐஸ்வர்யா ராய்: கொடுக்கலாம்.

அக்ஷய் குமார்: அநியாயம்.

அருணா சாயிராம்: கொடுக்க வேண்டியதுதான்.

ஹெலன்: காபரே நடனக்காரியாக புகழ் பெற்றவருக்கு அவார்டா என்று யோசிக்காதீர்கள். அவர் ஒரு காலத்தின் பிரதிநிதி. அவருக்கு கொடுக்க வேண்டியதுதான்.

ஹிருதயநாத் மங்கேஷ்கர்: கொடுக்கலாம்.

தெலுங்கு காமெடி நடிகர் பிரம்மானந்தம்: இவருக்கு எதற்கு விருது என்று எனக்கு புரியவில்லை.

ஐராவதம் மஹாதேவன்: சரித்திர ஆராய்சியாளராகத்தான் எனக்கு இவரை தெரியும். மிகத் தகுதியானவர்.

ஹிந்தி பின்னணி பாடகர் குமார் சானு: கொடுக்கலாம்.

டாக்டர் எஸ். கிருஷ்ணஸ்வாமி: இவர் “இந்தியன் ஃபில்ம்” என்ற புத்தகத்தை எழுதியவரா? எனக்கு இவரைப் பற்றி தெரியவில்லை.

ரேடியோ புகழ் அமீன் சயானி: இவரது குரல் ஒரு காலத்தில் மிக பிரபலாமானது. கொடுக்கலாம்.

கிரிக்கெட் வீரர்கள் டோனி, ஹர்பஜன் சிங்: கொடுக்கலாம்.

ஸ்னூக்கர் வீரர் பங்கஜ் அத்வானி: கொடுக்கலாம்.

மொத்தம் 93 பேருக்கு பத்மஸ்ரீ விருது கொடுக்கப்பட்டிருக்கிறது. தமிழ் நாட்டை சேர்ந்த டாக்டர் சிவராமன், டாக்டர் நூர்தீன், டாக்டர் சடகோபன், கிருஷ்ண குமார், சக்திவேல் ஆகியவர்களை பற்றி தெரியவில்லை.