Chess



கார்ல்சன் இன்றைய செஸ் ஆட்டக்காரர்களில் நம்பர் ஒன் இடத்தில் இருக்கும் இருபது வயது இளைஞர். ஆனந்தை தோற்கடித்து அடுத்த சாம்பியன் ஆகிவிடுவார் என்று பரவலாக எதிர்பார்க்கப்பட்டது. அவர் திடீரென்று தான் போட்டியில் கலந்து கொள்ளப் போவதில்லை என்று அறிக்கை விடுத்திருக்கிறார்.

பிரச்சினை இதுதான் – உலக செஸ் சாம்பியன்ஷிப் போட்டிகளில் இரண்டு ஸ்டேஜ் உண்டு. முதல் ஸ்டேஜில் இப்போதைய சாம்பியனோடு யார் போட்டி இடுவது என்று தேர்ந்தெடுப்பார்கள். அவர்தான் சாலஞ்சர். இரண்டாவது ஸ்டேஜில் தற்போதைய சாம்பியனோடு சாலஞ்சர் விளையாடுவார். யார் இந்த இருவரில் ஜெயிக்கிறாரோ அவர்தான் அடுத்த சாம்பியன். அதாவது ஃபெடரர் தற்போதைய விம்பிள்டன் சாம்பியன் என்று வைத்துக் கொண்டால்: முதலில் நடால் உட்பட்ட பலரும் யார் ஃபெடரரோடு ஃபைனல்ஸ் விளையாடுவது என்று தீர்மானிக்க போட்டி இடுவார்கள். ஃபெடரர் நேராக ஃபைனல்சுக்கு வந்துவிடுவார். நடால் பல கேம்கள் விளையாடி களைத்துப் போய் ஃபைனல்ஸ் வந்து இன்னும் தம் பிடித்து ஃபெடரரை வெல்ல வேண்டும். ஏழெட்டு வருஷம் முன்னால் ஒரு சாம்பியன்ஷிப் போட்டியில் இப்படித்தான் ஆனந்த் அற்புதமாக விளையாடி கடைசி ஸ்டேஜில் கார்போவிடம் தோற்றுப் போனார்.

இது அநியாயம் என்பதில் சந்தேகம் இல்லை. ஆனால் இப்போதுதான் 15-20 வருஷங்களுக்குப் பின் செஸ் உலகம் ஒன்றுபட்டு ஆனந்த் சாம்பியன் ஆகி இருக்கிறார். இந்த நிலையில் சாம்பியன் என்ற பதவியின் மதிப்பை குறைக்கும் எந்த முயற்சியும் வரவேற்கத் தக்கது இல்லை. கார்ல்சன் சரியான செயலை தவறான நேரத்தில் செய்திருக்கிறார். சரி ஆனந்துக்கு போட்டி இன்னும் சுலபம் ஆகிறது…

செஸ்ஸில் எப்போதுமே சாம்பியன்களுக்கு அதிக சலுகை அளிக்கப்படுகிறது. முன்னாளில் இதை விட மோசம்; இரண்டாவது ஸ்டேஜில் சாம்பியனும் சாலஞ்சரும் பத்து கேம் விளையாடுகிறார்கள் என்று வைத்துக் கொள்வோம். ஜெயித்தால் ஒரு பாயின்ட், டிரா செய்தால் அரை பாயின்ட், தோற்றால் பாயின்ட் கிடையாது. சாலஞ்சர் 5.5 பாயின்ட் பெற்றால்தான் அடுத்த சாம்பியன் ஆக முடியும். சாம்பியன் ஐந்து பாயின்ட் பெற்றால் போதும், அவரே சாம்பியனாகத் தொடர்வார். அதாவது சாலஞ்சர் என்று வருபவர் தான் சாம்பியனை விட பெட்டர் என்று நிரூபித்தால்தான் தற்போதைய சாம்பியனுக்கு கல்தா கொடுப்பார்கள். சாம்பியனுக்கோ தன்னை விட யாரும் பெட்டர் இல்லை (ஆனால் தனக்கு சமமாக இருக்கலாம்) என்று நிரூபித்தால் போதும். சமீப காலத்தில்தான் இந்த விதியை கழற்றிவிட்டு டைப்ரேக்கர் எல்லாம் வைக்கிறார்கள். போட்வினிக் இரண்டு முறை இப்படி பிரான்ஸ்டீனுடனும் ஸ்மிஸ்லோவுடனும் டிரா செய்தே உலக சாம்பியன் பதவியை தக்க வைத்துக் கொண்டிருக்கிறார்.

ஐம்பது வருஷம் முன்னால் நிலை இதை விட மோசம்: சாலஞ்சர் வென்று உலக சாம்பியன் ஆன பிறகும் பழைய சாம்பியன் அவரை ஒரு rematch-க்கு கூப்பிடலாம். (ஆனால் சாலஞ்சர் கூப்பிட முடியாது). போட்வினிக் இப்படி இரண்டு முறை rematch-இல் ஜெயித்து தன சாம்பியன் பதவியை தக்க வைத்துக் கொண்டிருக்கிறார். ஸ்மிஸ்லோவ், தால் இருவரும் அப்படி தங்கள் உலக சாம்பியன் பதவியை கொஞ்ச காலத்திலேயே கோட்டை விட்டார்கள்.

கார்ல்சன் அடுத்த போட்டி வரை பொறுத்திருந்திக்கலாம்…

தொகுக்கப்பட்ட பக்கம்: செஸ்

Advertisements

  1. என்றைக்கு சோவியத் யூனியன் உடைந்ததோ அன்றே செஸ்சுக்கு ஸ்பான்சர்ஷிப் திண்டாட்டம்தான். இன்று செஸ் போட்டிகளில் பணம் என்பது செஸ்சில் ஆர்வம் உள்ள தனி மனிதர்கள் (கால்மிகியா நாட்டு அதிபர் இல்யும்ஜிநோவ்), அவர்கள் நடத்தும் நிறுவனங்கள், செஸ்சை கம்ப்யூட்டர்களின் processing power-ஐ விளம்பரப்படுத்தும் ஒரு கருவியாக பயன்படுத்தும் இன்டல் போன்ற நிறுவனங்கள் இவைதான் செஸ்சில் பணத்தைப் போடுகின்றன. செஸ் ஒரு டிவி நிகழ்ச்சி இல்லை. நிறுவனங்களுக்கு விளம்பரம் செய்ய மோடிவேஷன் குறைவு. இந்த சாம்பியன்ஷிப் போட்டிக்கு ஸ்பான்சர் செய்ய பல்கேரியா தவிர யாருமே முன் வரவில்லை. பல்கேரியாவும் டொபலோவ் விளையாடாவிட்டால் ஸ்பான்சர் செய்திருக்காது. இந்த விளையாட்டு தழைக்குமா?
  2. பொதுவாக இன்றைய செஸ் வீரர்களுக்கு செஸ் மட்டும்தான் தெரியும். செஸ்சை எப்படி மேலும் சுவாரசியமாக ஆக்குவது என்றெல்லாம் அவர்கள் யோசிப்பதில்லை. டொபலோவ், ஷிரோவ் போன்றவர்களின் aggressive விளையாட்டு முறை அவர்களின் பாணி மட்டுமே, அது பார்ப்பவர்களை கவர ஏற்பட்டதில்லை. (எல்லாருக்கும் சேவாக் ஆடுவதைப் பார்க்க பிடிக்கிறது, ஆனால் சேவாக் அப்படி ஆடுவது அவரது பாணி, அவ்வளவுதான்.) ஐந்து நாள் கிரிக்கெட் இன்று ட்வென்டி-ட்வென்டி ஆக மாறி இருப்பது போல செஸ் மாறுமா?
  3. ஆனந்த் வருவதற்கு முன் செஸ் ஒரு career என்று இந்தியாவில் யாரும் நினைத்ததில்லை. இன்று நிறைய பேர் வந்திருக்கிறார்கள். சசிகிரண், கங்குலி, கொனேரு ஹம்பி மாதிரி. அடுத்த ஜெனரேஷன் செஸ்சுக்கு வருமா?
  4. கிராண்ட்மாஸ்டர்கள் விளையாடும்போது பல முறை பத்து இருபது மூவ் ஆடிவிட்டு சமநிலையில் இருப்பார்கள். ஒருவர் டிரா செய்துகொள்ளலாமா என்று கேட்பார். அடுத்தவர் சரி என்று கை கொடுத்துவிட்டு போய்விடுவார். ஒரு பத்து ரவுண்ட் போட்டியில் விளையாடும்போது இப்படி ஒரு டிரா அவர்களுக்கு ஒரு நாள் ஓய்வை கொடுக்கிறது. அது அடுத்த நாள் விளையாட இன்னும் கொஞ்சம் தெம்பை கொடுக்கிறது. ஆனால் பார்ப்பவர்கள் நிலை? ஐந்து நாள் டெஸ்ட் கிரிக்கெட்டில் முதல் டீம் தன் இன்னிங்க்சுக்கு மூன்று நாள், அடுத்த டீம் மிச்ச இரண்டு நாள் எடுத்துக் கொள்வது மாதிரி நிகழ்ச்சி இது. டொபலோவ் இந்த முறை சோஃபியா விதி என்று ஒன்றை கடைப்பிடித்தார். டிரா செய்துகொள்ளலாமா என்று கேட்பதே இல்லை. அனேகமாக இந்த போட்டியின் எல்லா டிராக்களும் செஸ் விதிகளின்படி டிரா ஆனவை. (ஒரு பொசிஷன் மூன்று முறை நேர்ந்தால் அது டிரா). ஆனந்த் எட்டாம் ஆட்டத்தில் தோற்றது சாதாரணமாக கிராண்ட்மாஸ்டர் லெவலில் நடக்கவே நடக்காது. ஐம்பத்தைந்து மூவ் வரைக்கும் சமநிலை என்றால் டிரா என்று இருவரும் ஒத்துக்கொண்டு போயிருப்பார்கள். ஆனந்த் ஐம்பத்தாறாவது மூவில் தவறு செய்தார், உடனே தோல்வியை ஒத்துக்கொண்டு போய்விட்டார். இந்த சோ ஃ பியா விதி எல்லா போட்டிகளிலும் கடைப்பிடிக்கப்பட்டால் டிராக்கள் குறையும். அது செஸ்சின் எதிர்காலத்துக்கு நல்லது. (இது எப்போதும் இளைஞர்களுக்கு சாதகமான விதி, கிழவர்கள் தாக்குப் பிடிப்பது கொஞ்சம் கஷ்டம்)
  5. இவர்களின் ஆட்டங்கள் எல்லாமே high quality ஆட்டங்கள். ஒவ்வொரு ஆட்டமும் டென்ஷன் மிகுந்தது. ஆனந்த் ஒரு சிம்பிள் டாக்டிக்ஸ் வைத்திருந்தார். கொஞ்சம் பலவீனமான, ஆனால் solid பொசிஷன் வரும்படி விளையாடினார். டோபலோவை முடிந்தால் ஜெயித்துக்கொள் என்று சீண்டிவிட்டார். டொபலோவ் சளைக்காமல் ஒவ்வொரு முறையும் கடுமையாக முயன்றார். ஆனால் ஆனந்த் outright blunder செய்தபோது மட்டுமே அவரால் வெல்ல முடிந்தது. ஆனந்தின் கடைசி வெற்றி மட்டுமே இப்படி டோபலோவின் outright blunder-aal வந்தது. மற்ற இரண்டு வெற்றிகளில் டொபலோவ் எங்கு தவறு செய்தார் என்று தேட வேண்டும். விடாக்கண்டன்-கொடாக்கண்டன் மாதிரி இருவரும் ஆடினார்கள். Bias இல்லாமல் சொல்கிறேன், ஆனந்தின் ஆட்டம் ஒரு மாற்று மேல்.
  6. ஆனந்துக்கு அந்த நீல NIIT சட்டையை விட்டால் வேறு எதுவுமே இல்லையா? மகா கோரமான சட்டை. டொபலோவ் எப்போதும் நீட்டாக டிரஸ் செய்து கொண்டு வந்தார்.
  7. அடுத்த முறை ஆனந்த் ஜெயிப்பது கஷ்டம் என்று நினைக்கிறேன். டொபலோவ், கார்ல்சன் இருவரில் யாராவது அடுத்த சாம்பியனாக வருவார்கள் என்று யூகிக்கிறேன். அரோநியனுக்கு outside chance.

தொகுக்கப்பட்ட பக்கம்: செஸ்


இன்றைக்கு ஆனந்துக்கு கறுப்பு. செஸ் விளையாட்டில் கறுப்பு கலர் சின்ன disadvantage. புள்ளிவிவரங்களைப் பார்த்தால் வெள்ளைக் கலர்தான் நிறைய ஆட்டங்களில் ஜெயிக்கிறது. முக்கால்வாசி கிராண்ட்மாஸ்டர்கள் கறுப்பு கலர் வந்தால் டிரா செய்யத்தான் விளையாடுவார்கள். ஆனந்தும் சில வருஷங்களாக அப்படித்தான். டொபலோவ் கறுப்பு கலர் வந்தாலே ஜெயிக்கத்தான் விளையாடுவார். இன்றைக்கு வெள்ளை. இந்தப் போட்டியில் momentum வேறு டொபலோவ் பக்கம் போய்விட்டது. இன்று ஆட்டம் டிரா ஆனால் அடுத்தபடி டைப்ரேக்கர். அதில் மிக வேகமாக விளையாட வேண்டும். முன்பிருந்த வேகம் குறைந்துவிட்டாலும் ஆனந்த் வேகமாக விளையாடுவதில் கில்லாடி. இன்னும் இளைஞராக இருந்தபோது lightning kid என்ற அடைமொழி அவருக்கு நிஜமாகவே பொருத்தமானதுதான். ஆனந்த் டைப்ரேக்கருக்கு போவதற்குத்தான் பார்ப்பார், அதனால் இன்று ஒரு பாதுகாப்பான drawish கேம்தான் விளையாடுவார் என்று எதிர்பார்த்தேன்.

ஆனந்த் super-solid Lasker defense விளையாடினார். முடிந்தால் ஜெயித்துக்கொள் என்று டொபலோவை கொஞ்சம் சீண்டுவது போல இருந்தது. கிடுகிடுவென்று விளையாடினார். Foreplay எல்லாம் முடிந்து பார்த்தால் ஆனந்துக்கு c pawn isolated pawn. (isolated pawn – இரு புறமும் வேறு சிப்பாய்கள் கிடையாது) ஆனால் அவரது காய்களுக்கு நகர இடம், டொபலோவ் ஏதாவது தவறு செய்தால் உடனே அதை ஊதி ஊதி பெரிதாக்கும் வாய்ப்பு இருந்தது. அவரது isolated pawn-க்கு இரு புறமும் – b மற்றும் d ஃபைல்களில் – நல்ல ஸ்கோப் இருந்தது. அவரது பிஷப் நல்ல active ஆக இருந்தது. நீண்ட h1-a8 diagonal-இல் டோபலோவின் ராஜா மேல் கண் வைத்துக்கொண்டிருந்தது.

இருவருக்கும் ப்ளான் தெளிவு. டொபலோவுக்கு அந்த isolated pawn ஒரு நல்ல target.தன் காய்கள் எல்லாவற்றையும் கொண்டு அதை எவ்வளவு முடியுமோ அவ்வளவு தாக்கலாம். இரு புறமும் வேறு சிப்பாய்கள் இல்லாததால் ஆனந்த் தன் மற்ற வலுவான காய்களைத்தான் இதை பாதுகாக்க பயன்படுத்தி ஆக வேண்டும். ஆனந்த் தன் பிஷப்பை, பாதி திறந்திருக்கும் b மற்றும் d ஃபைல்களை பயன்படுத்தி தன் காய்களை நல்ல இடத்தில் வைக்க வேண்டும். வாய்ப்பு கிடைத்தால் டோபலோவின் ராஜாவை தாக்க வேண்டும் – அதற்கு அந்த பிஷப் உதவியாக இருக்கும். ஆட்டம் சரிசமமான நிலையில் இருந்தது, ஆனால் நல்ல டென்ஷன்.

டொபலோவ் கோட்டை விட்டார். அவரது 31 மற்றும் 32-ஆவது மூவ்கள் இரண்டும் தவறு. திடீரென்று ஆனந்தின் ராணி, ரூக், பிஷப் எல்லாம் டோபலோவின் ராஜாவை குறி வைக்கின்றன. அந்த ராஜாவை சுற்றி இருக்க வேண்டிய சிப்பாய்கள் எல்லாம் வெட்டுப் போய்விட்டன, நகர்ந்துபோய்விட்டன. என் லெவலில் கூட இந்த மாதிரி மூவ் தவறு என்று தெரியும். ஆனால் டொபலோவ் லெவலில் ஆடுபவர்கள், அதுவும் டொபலோவ் போல காம்ப்ளிகேஷன் என்றால் அல்வா என்பவர்கள், தப்பிக்க வழி, இல்லாவிட்டால் தோற்கடிக்கவே வழி கண்டுபிடித்திருக்கலாம். அதனால் என் மாதிரி ஆட்களுக்குத்தான் டென்ஷன். ஒன்பதாவது கேமில் பாருங்கள், டொபலோவ் திடீரென்று தன் குதிரையை வெட்டுக் கொடுத்தார், தோற்கப் போகிறார் என்று நினைத்த கேம் டிரா ஆகிவிட்டது. இத்தனைக்கும் எல்லாரும் டொபலோவுக்கு ஆப்பு என்கிறார்கள், இருந்தாலும் சின்ன பயம். அதுவும் நமக்கு ஜெயிக்க நேர் வழி தெரிந்தால் ஆனந்துக்கு அதை விட சிறந்த, சிம்பிளான வழிகள் எல்லாம் தெரிகிறது. நான் நினைத்த மூவ்களை ஆனந்த் தள்ளிப்போட்டுக் கொண்டே போனார். என்னாகுமோ ஏதாகுமோ என்று பார்த்துக் கொண்டிருந்தேன்.

வான வேடிக்கை எல்லாம் முடிந்த பிறகு ஆனந்துக்கு ராணி; டொபலோவுக்கு ஒரு ரூக், ஒரு குதிரை. அந்த நிலையில் எனக்கே கூட டொபலோவை தோற்கடிக்க சான்ஸ் உண்டு. டொபலோவ் ஆனால் ஏதோ நப்பாசையில் விளையாடிக் கொண்டே இருந்தார். கடைசியில் அவர் கை கொடுத்தபோது திருப்தியாக இருந்தது.

ஆனந்துக்கு அதிர்ஷ்டம்தான். இந்த ஆட்டத்தில் ஆனந்த் ஜெயிக்கவில்லை, டொபலோவ் தோற்றார். ஆனால் செஸ்ஸில் இதெல்லாம் சகஜமப்பா! பாருங்கள், முதல் கேமிலும், எட்டாவது கேமிலும் டொபலோவ் ஜெயிக்கவில்லை, ஆனந்த் தோற்றார்.

Viswanathan Anandஆனந்துக்கு வாழ்த்துக்கள்!

இன்னும் கொஞ்சம்:

இட்லிவடை தளத்தில் லலிதாராம் என்பவரும் தமிழில் இந்த ஆட்டங்களை பற்றி எழுதுகிறார். அதையும் படித்துப் பாருங்கள். இந்த ஆட்டத்தைப் பற்றி இங்கே.

இந்த போட்டி பற்றி overall எழுத வேண்டும் என்றும் விட்டுப்போன ஆட்டம் # 8,9,10,11 பற்றி ஒரு பதிவு எழுத வேண்டும் என்றும் நினைத்துக் கொண்டிருக்கிறேன். ஆட்டம் #9 இந்த போட்டியின் மிகச் சிறந்த ஆட்டம். பார்ப்போம்.

என்டிடிவியில் ஆனந்தை நாலு கேள்வி கேட்கிறார்கள். அந்த கேள்வி கேட்பவனைப் போல கேனையனை நான் பார்த்ததில்லை. மயிரிழையில் ஆனந்த் வென்றிருக்கிறார். கடைசி கேம் வரைக்கும் விளையாடி were you toying with Topalov என்று கேட்கிறான். கறுப்பு காய்களோடு வென்றிருக்கிறார்; பிளாக் மாஜிக் என்று சொல்ல வேண்டும் என்று தீர்மானித்துக்கொண்டு அதையே சொல்லுகிறார்கள். மாஜிக்கும் இல்லை மண்ணாங்கட்டியும் இல்லை, டொபலோவ் சொதப்பிவிட்டார். இந்த அடிப்படை விஷயம் கூட தெரியாமல் பேட்டி எடுத்து, உயிரை வாங்குகிறார்கள். ஆனந்துக்கு எரிச்சல் வருவதும், அதை அடக்கிக் கொள்வதும் தெளிவாகத் தெரிகிறது. பிரஸ் கான்ஃபரன்ஸ் வீடியோவை இன்னும் காணோம், அதனால் இதைத்தான் தர வேண்டி இருக்கிறது.

லலிதாராம் ஒரு நல்ல வீடியோ சுட்டியை கொடுத்திருக்கிறார்.

ஆட்டம் pgn நொடேஷனில்:
[WhiteElo “2805”] [BlackElo “2787”] [PlyCount “112”] [EventDate “2010.04.24”] [EventType “match”] [EventRounds “12”] [EventCountry “BUL”]

1. d4 d5 2. c4 e6 3. Nf3 Nf6 4. Nc3 Be7 5. Bg5 h6 6. Bh4 O-O 7. e3 Ne4 8. Bxe7Qxe7 9. Rc1 c6 10. Be2 Nxc3 11. Rxc3 dxc4 12. Bxc4 Nd7 13. O-O b6 14. Bd3 c5 15. Be4 Rb8 16. Qc2 Nf6 17. dxc5 Nxe4 18. Qxe4 bxc5 19. Qc2 Bb7 20. Nd2 Rfd8 21. f3 Ba6 22. Rf2 Rd7 23. g3 Rbd8 24. Kg2 Bd3 25. Qc1 Ba6 26. Ra3 Bb7 27. Nb3 Rc7 28. Na5 Ba8 29. Nc4 e5 30. e4 f5 31. exf5 e4 32. fxe4 Qxe4+ 33. Kh3 Rd4 34.Ne3 Qe8 35. g4 h5 36. Kh4 g5+ 37. fxg6 Qxg6 38. Qf1 Rxg4+ 39. Kh3 Re7 40. Rf8+ Kg7 41. Nf5+ Kh7 42. Rg3 Rxg3+ 43. hxg3 Qg4+ 44. Kh2 Re2+ 45. Kg1 Rg2+ 46. Qxg2 Bxg2 47. Kxg2 Qe2+ 48. Kh3 c4 49. a4 a5 50. Rf6 Kg8 51. Nh6+ Kg7 52. Rb6 Qe4 53. Kh2 Kh7 54. Rd6 Qe5 55. Nf7 Qxb2+ 56. Kh3 Qg7 0-1

தொகுக்கப்பட்ட பக்கம்: செஸ்

தொடர்புடைய பதிவுகள்:
ஆனந்த் உலக சாம்பியன்!

ஆனந்த்-டொபலோவ் ஆட்டம் #8
ஆனந்த்-டொபலோவ் ஆட்டம் #7
ஆனந்த்-டொபலோவ் ஆட்டம் #6
ஆனந்த்-டொபலோவ் ஆட்டம் #5
முதல் 4 ஆட்டங்கள்

செஸ்வைப்ஸ் – ஆட்டங்கள், வீடியோக்கள்
ஆனந்த்-டொபலோவ் – லைவ், ஆடும்போது என்ன நடக்கிறது என்று பார்க்க
சூசன் போல்காரின் ரன்னிங் கமெண்டரி
லலிதாராமின் இட்லிவடை தளப் பதிவு
ஆனந்தின் பேட்டி வீடியோ
என்டிடிவி வீடியோ


ஆனந்த் கடைசி ஆட்டத்தை வென்று உலக சாம்பியன் ஆக தொடர்கிறார். இப்போதுதான் மீண்டும் இந்த போட்டி பற்றி எழுத மூடே வருகிறது!

டொபலோவின் தவறுகள் மூலம்தான் அவர் வென்றார். பிற விவரங்களை அப்புறம் தர முயற்சிக்கிறேன்.

தொகுக்கப்பட்ட பக்கம்: செஸ்

ஆனந்த்-டொபலோவ் ஆட்டம் #8
ஆனந்த்-டொபலோவ் ஆட்டம் #7
ஆனந்த்-டொபலோவ் ஆட்டம் #6
ஆனந்த்-டொபலோவ் ஆட்டம் #5
முதல் 4 ஆட்டங்கள்

செஸ்வைப்ஸ் – ஆட்டங்கள், வீடியோக்கள்
ஆனந்த்-டொபலோவ் – லைவ், ஆடும்போது என்ன நடக்கிறது என்று பார்க்க
சூசன் போல்காரின் ரன்னிங் கமெண்டரி


இன்று ஆனந்துக்கு தோல்வி. டோபலோவ் மிக அற்புதமாக ஆடினார். இருவரும் இப்போதும் சம நிலையில் இருக்கிறார்கள். அடுத்த நாலு ஆட்டத்தில் யார் நிறைய வெல்கிறார்களோ அவர்கள்தான் சாம்பியன்.

ஆனந்த் தோல்வியால் விவரமாக எழுத மூட் இல்லை. நாளை எழுதுகிறேன்.

தொகுக்கப்பட்ட பக்கம்: செஸ்

தொடர்புடைய பதிவுகள்:
ஆனந்த்-டொபலோவ் ஆட்டம் #7
ஆனந்த்-டொபலோவ் ஆட்டம் #6
ஆனந்த்-டொபலோவ் ஆட்டம் #5
முதல் 4 ஆட்டங்கள்

செஸ்வைப்ஸ் – ஆட்டங்கள், வீடியோக்கள்
ஆனந்த்-டொபலோவ் – லைவ், ஆடும்போது என்ன நடக்கிறது என்று பார்க்க
சூசன் போல்காரின் ரன்னிங் கமெண்டரி


என்ன ஒரு பிரமாதமான ஆட்டம்!

இன்று ஆனந்துக்கு வெள்ளை. அவர் வழக்கம் போல Catalan Opening -இல் ஆரம்பித்தார். ஆனால் டொபலோவ் நான்காவது மூவிலேயே வேறு மாதிரி ஆடத் தொடங்கினார். எட்டாவது மூவில் அவருக்கு பிடித்த மாதிரி positional imbalance உருவாக்கினார். பனிராண்டாவது மூவ் வரும்போது sacrifice! வலுவான ரூக்கை கொஞ்சம் வலுக் குறைந்த பிஷப்புக்கு exchange செய்துவிட்டார். பதினாறாவது மூவில் இன்னொரு exchange sacrifice; இருபது மூவில் டொபலோவுக்கு ஒரு சிப்பாய்தான் அதிகம் – d pawn. ஆனால் அது ஒரு passed pawn. (passed pawn என்றால் அந்த சிப்பாய்க்கு எதிராகவோ, இல்லை இரண்டு பககத்திலுமோ எதிராளியின் சிப்பாய் எதுவும் இல்லை என்று அர்த்தம். அப்படிப்பட்ட ஒரு சிப்பாய்க்கு ராணியாக மாற வாய்ப்பு அதிகம்.) ஆனந்துக்கு ஒரு குதிரை அதிகம், ஆனால் அந்த குதிரை இன்னும் தன ஆரம்பக் கட்டத்தை விட்டு நகரவே இல்லை. நகர்த்துவது இன்னும் கஷ்டம்தான். For all practical purposes , that knight is still not part of the game. ஆனந்த் அந்த குதிரையை உயிர்ப்பித்து ஆட்டத்தில் நுழைக்க முயற்சி செய்ய வேண்டும், டொபலோவ் அதை நகர விடாமல் அங்கேயே வைத்திருக்க முயற்சி செய்ய வேண்டும்.

இது டொபலோவின் home preparation என்று நினைக்கிறேன்.இருபது மூவ்களையும் கிடுகிடு என்று ஆடிவிட்டார். ஆனந்துக்கு பதில் மூவ் செய்ய ஒரு மணி நேரம் ஆயிற்று. (இரண்டு பேரும் முதல் நாற்பது மூவை இரண்டு மணி நேரத்தில் செய்ய வேண்டும்.) டொபலோவ் அசத்திவிட்டார். இந்த மாதிரி அதிரடி ஆட்டம்தான் அவருடைய பலம். இந்த மாதிரி நிலையை கொண்டு வரவும், அப்படி ஒரு நிலை வந்த பிறகு அதை வெற்றியாக மாற்றுவதும் அவருக்கு கை வந்த கலை. நான் இந்த கட்டத்தில்தான் ஆட்டத்தை பார்த்தேன். இன்றைக்கு ஆனந்துக்கு கொஞ்சம் கஷ்டம்தான் என்று தோன்றியது. என் மாதிரி ஆரம்ப நிலை வீக் ஆட்டக்காரனுக்கே இது தெரிகிறது என்றால் பார்த்துக் கொள்ளுங்கள்!

இதற்கப்புறம் ஆனந்தின் ஆட்டம் அபாரம்! டொபலோவ் விடாக்கண்டன் மாதிரி ஆடினால் இவர் கொடாக்கண்டன் மாதிரி ஆடுகிறார். ஆனால் அந்த அபாரமான ஆட்டம் டொபலோவின் ஒரு (சிறு) தவறில் தொடங்குகிறது. 21-ஆவது மூவில் டொபலோவ் தன பிஷப்பை f8 கட்டத்துக்கு நகர்த்துகிறார். ஆனந்த் இந்த வாய்ப்பை பயன்படுத்தி தன் பிஷப்பை c3 கட்டத்துக்கு கொண்டு வருகிறார். இப்போது அவருக்கு குதிரையை ஆட்டத்துக்குள் கொண்டு வர d2 கட்டம் கிடைத்துவிடுகிறது. இப்போது ஆனந்த் தவறு செய்துவிட்டார் என்று நிபுணர்கள் கருதுகிறார்கள். அவர் குதிரையை d2 கட்டத்துக்கு கொண்டு வந்து உயிர்ப்பிப்பதை ஒரு மூவ் தாமதப்படுத்தி இருக்க வேண்டுமாம். analysis எனக்கு புரியவில்லை. அப்புறம் பிஷப்புகள் exchange ஆகின்றன. இருவருக்கு forced draw (செஸ்சில் ஒரு பொசிஷன் மூன்று முறை ஏற்பட்டால் டிரா) செய்ய வாய்ப்புகள் இருந்தன. ஆனால் இப்போது ஆனந்த் தனக்கு வெற்றி பெற வாய்ப்பு இருப்பதாக எண்ணி இருக்க வேண்டும். அவர் forced draw -ஐ நிராகரித்து மேலும் விளையாடினார்

நாற்பதாவது மூவ் வாக்கில் விஷயம் சிம்பிளாகிவிட்டது. டொபலோவ் ஜெயிக்க ஒரே வாய்ப்புதான் – எப்படியாவது அந்த d passed pawn-ஐ ராணியாக்க வேண்டும். அதற்கு அது இரண்டு கட்டம் நகர வேண்டும். ஆனந்துக்கு ஜெயிக்க ஒரே வாய்ப்புதான். ராணிகளை exchange செய்துவிட்டு தன் ராஜா, குதிரை ஆகியவற்றை வைத்து டொபலோவின் சிப்பாய்களை தூக்க வேண்டும். டொபலோவால் தன் சிப்பாயை ஒரு கட்டம் நகர்த்த முடிந்தது. அடுத்த கட்டத்துக்கு கடைசி வரை போக முடியவில்லை. ஆனந்துக்கு தன் ராணியை exchange செய்ய முடியவில்லை. இரண்டு பேரும் கடுமையாக முயற்சி செய்து பார்த்தார்கள். கடைசியில் ஒரே பொசிஷன் மூன்றாவது முறை வர, கேம் டிரா.

மிகச் சிறந்த ஆட்டம். டொபலோவ் டொபலோவ் மாதிரி விளையாட முடிந்தது பெரிய திருப்பம். இனி மேல் இதே மாதிரி ஆடினால் ஆனந்துக்கு கஷ்டம்தான். அவருக்கு அடுத்த ஐந்து ஆட்டங்களில் மூன்று வெள்ளை என்பது ஒரு சின்ன advantage. ஆனந்த் வெற்றி வாய்ப்பைத் தவற விட்டுவிட்டார் என்று சில நிபுணர்கள் சொல்கிறார்கள். எனக்கு அது எங்கே என்று இன்னும் பிடிபடவில்லை. ஆனால் இந்த ஆட்டத்தைப் பற்றி அவர் நிச்சயமாக பெருமைப்படலாம். சுருக்கமாக சொன்னால் இன்றைய ஆட்டம் irresistible force vs immovable object.

தொகுக்கப்பட்ட பக்கம்: செஸ்

தொடர்புடைய பதிவுகள்:
ஆனந்த்-டொபலோவ் ஆட்டம் #6
ஆனந்த்-டொபலோவ் ஆட்டம் #5
முதல் 4 ஆட்டங்கள்

செஸ்வைப்ஸ் – ஆட்டங்கள், வீடியோக்கள்
ஆனந்த்-டொபலோவ் – லைவ், ஆடும்போது என்ன நடக்கிறது என்று பார்க்க
சூசன் போல்காரின் ரன்னிங் கமெண்டரி


இன்றைக்கு ஆனந்துக்கு வெள்ளை. ஆனந்த் வெற்றி பெற்றால் டொபலோவ் almost காலி. டொபலோவ் வென்றால் பிற்பாதியில் இருவரும் சமநிலையில் ஆரம்பிப்பார்கள். ஆனந்த் இருக்கிற ஒரு பாயின்ட் லிடை தக்க வைத்துக் கொள்வோம், டிரா போதும் என்று நினைத்தாற்போல தெரிகிறது.

ஆட்டம் மீண்டும் Catalan opening. ஒரு இருபது மூவுக்கு அப்புறம் ஆனந்துக்கு இரண்டு குதிரை, டொபலோவுக்கு இரண்டு பிஷப்பும். இரண்டு பிஷப்பும் இருப்பது நல்ல விஷயம், endgame-இல் 64 கட்டத்தையும் சுலபமாக கட்டுப்படுத்தலாம். ஆனால் ஆனந்தின் குதிரைகள் மிகவும் active ஆக இருந்தன. ஒரு கட்டத்தில் ஒரு பத்து மூவ் தொடர்ச்சியாக குதிரைகளையே நகர்த்திக் கொண்டிருந்தார். Looked like he was toying with Topalov! சில சமயம் எதிராளியை வெறுப்பேற்றுவதற்காக சும்மா வெறும் மூவ்கள் செய்வோம். அந்த மாதிரிதான் ஆடிக் கொண்டிருந்தார்.

ஒரு குதிரையும் பிஷப்பும் exchange ஆன பிறகு initiative டொபலோவ் பக்கம் போனது. ஒரு கட்டத்தில் டொபலோவ் தன பிஷப்பை h3 கட்டத்தில் வைத்தார். அப்போது ஆனந்த் சிறு தவறு செய்திருந்தாலும் ஆப்புதான். ஆனந்த் precise ஆக ஆடி கடைசியில் டிரா செய்தார்.

ஆனந்தின் strategy டொபலோவை frustrate செய்வது என்று தெரிகிறது. அவர் டொபலோவுக்கு ஓரளவு initiative வரும்படி விளையாடுகிறார். ஆனால் அந்த initiative வெற்றி பெறப் போதாது. அதன் பிறகு மிகவும் accurate defensive மூவ்களை விளையாடுவதால் அந்த initiative வேலைக்கு ஆவதில்லை. தன்னுடைய திறமை மேல் அபாரமான நம்பிக்கை உள்ளவர்தான் இப்படி செய்ய முடியும்.

தொகுக்கப்பட்ட பக்கம்: செஸ்

தொடர்புடைய பதிவுகள்:
ஆனந்த்-டொபலோவ் ஆட்டம் #5
முதல் 4 ஆட்டங்கள்

செஸ்வைப்ஸ் – ஆட்டங்கள், வீடியோக்கள்
ஆனந்த்-டொபலோவ் – லைவ், ஆடும்போது என்ன நடக்கிறது என்று பார்க்க
சூசன் போல்காரின் ரன்னிங் கமெண்டரி

அடுத்த பக்கம் »