SUJATHOUGHTS (TAMIL)

இந்த நவீன உலகில் வாழும் மக்களுக்கு எதையும் விரித்துச் சொன்னால் பிடிப்பதில்லை.  பிடிப்பதில்லை என்பதைவிட , விரிவான விஷயத்தை, செய்தியை படிக்கவோ, கேட்கவோஅவர்களுக்கு  நேரமில்லை என்பதே உண்மை.  ஆகவே “சுருங்கச் சொல்லி விளங்க வைத்தல்” என்கிற நடைமுறையை ஊடகங்களும் ஏற்றுக்கொண்டுவிட்டன.

அதன்படியே, இன்று அச்சு ஊடகங்களும், காட்சி ஊடகங்களும் நன்றாகவே அதை அமல் படுத்தவும் செய்கின்றன.

அதை உள்வாங்கிக்கொண்டுதான் ‘விகடன்’ குழுமத்திலிருந்து முன்பு வெளிவந்துகொண்டிருந்த ‘விகடன் பேப்பர்’ நாளிதழில், ‘சுஜாதாட்ஸ்’ என்ற தொடர் வெளிவந்தது.  அன்றைய காலகட்டத்தில் நிகழ்ந்த முக்கிய நிகழ்வுகளையும், சம்பவங்களையும் தன் சிந்தனை ஓட்டத்தில் இருந்து எழுத்தாளர் சுஜாதா எழுதிவந்தார்.

அதே நேரத்தில், அப்போது நடந்த சில விஷயங்களை, இன்று வாசிக்கிறபோது, வியப்பாகவும் அதிர்ச்சியாகவும் இருக்கின்றன.  அந்த சுவாரஸ்யங்களை, வாசகர்கள் மிகவும் ரசிக்கிறார்கள் என்பதை கருத்தில் கொண்டுதான் இந்தக் கட்டுரைகள் தொகுக்கப்பட்டு இருக்கின்றன.

சுஜாதாவின் முன்னுரை  (செப்டம்பர்  2007)

விகடன் நிறுவனத்திலிருந்து சில காலம் வெளிவந்த ‘விகடன் பேப்பர்’ நாளிதழின் ஆசிரியர் பாலன் அவர்கள் என்னை, சிறிய கட்டுரைகள் எழுதச் சொன்னார்.  ‘சுஜாதாவின் எண்ணங்கள்’ என்கிற கொஞ்சம் அசௌகரியமான தலைப்பை நவீனப்படுத்தி ‘சுஜாதாட்ஸ்’ என்று சுருக்கி வெளியிட்டார்கள்.  இவ்வகையிலான சின்னச்சின்ன கட்டுரைகள் எழுத எனக்கு எப்போதும் இஷ்டம்.  சுவாரஸ்யமாக சொல்லிக்கொண்டே போய்,  அலுக்கும்போல் தெரிந்தால், முடித்து விடலாம்.

Advertisements